Hagnýtar upplýsingar

Ef nemandi þarf leyfi eða hann getur ekki komið vegna veikinda eða af öðrum orsökum er óskað eftir því að foreldrar láti vita í síma/símsvara, tölvupósti eða með skriflegri orðsendingu. Æskilegt er að þær upplýsingar berist fyrir klukkan 10.00 að morgni. 

Skólaveturinn 2023 – 2024 fá nemendur og starfsfólk heitan mat í hádeginu frá fyrirtækinu Krúsku. Nemendur í 10. bekk afgreiða matinn og vinna sér um leið inn peninga í ferðasjóð 10. bekkinga en þeir safna fyrir Danmerkurferð/vorferð fyrir útskrift. Meiri hluti nemenda er áskrifandi að heita matnum en nokkrir kjósa að koma með nesti að heiman eða skjótast í löngu frímínútunum í búð eða bakarí í Miðborginni. Nemendum býðst að útbúa sér hafragraut þeim að kostnaðarlausu. Í eldhúsi á 3. hæð hafa nemendur aðgang að haframjölsskömmtum (keyptir í Costco). Þeim reynist auðvelt að hella soðnu vatni út á mjölið og ákveða þannig sjálfir  hversu þykkur hann á að vera. Epli eru að jafnaði á boðstólum og auk þess geta nemendur sem það kjósa keypt beyglur og samlokubrauð og hitað í brauðgrilli í eldhúsinu. Þeir smyrja sjálfir og bæta við osti, rjómaosti, skinku/pepperoni að vild. Bæði heiti maturinn og beyglur eru greidd með skólagjöldum einu sinni í mánuði, á kostnaðarverði.

Kennarar hafa ekki fastan viðtalstíma í skólanum. Ef foreldrar/forráðamenn óska eftir spjalli við kennara geta þeir sent tölvupóst, eða haft samband símleiðis. Ef kennarinn getur ekki brugðist strax við tekur ritari eða annar starfsmaður við skilaboðum og kennarinn hringir við fyrsta tækifæri. Það er auðsótt mál að óska eftir viðtali í skólanum. Þá er framgangurinn með sama hætti, nema fundartíminn er ákveðinn með einhverjum fyrirvara.

Allir nemendur skólans eru slysatryggðir. Ef nemandi slasast á skólatíma, hvort sem er í skólanum eða utan hans, s.s. á skólalóð eða á ferðum á vegum skólans greiðir skólinn kostnað vegna komu nemanda á slysadeild. Sama gildir um kostnað vegna flutnings nemenda frá skóla og til slysadeildar. Tannviðgerðir á nemendum tilkomnar vegna slysa í skóla eða á skólalóð á skólatíma eru endurgreiddar að hluta af Tryggingastofnun ríkisins. Það sem eftir er greiðir borgarsjóður, að ákveðinni upphæð, vegna einstaks slyss.

Persónulegir munir nemenda eru ekki tryggðir. Brýnt er fyrir nemendum að skilja ekki eftir verðmæti þar sem ekkert eftirlit er til staðar.  

Ef nemandi veldur vísvitandi skemmdum á eigum skólans, annarra nemenda eða þeirra sem þar starfa er hann bótaskyldur. Sérstakur samningur er gerður um afnot nemenda af tölvum skólans en hver nemandi hefur ,,sína“ tölvu sem er í eigu skólans.

Kostnaður vegna flutnings nemenda milli skóla og slysadeildar er greiddur. 

Skólastjóri sér um að ganga öðru hverju með óskilamuni í stofurnar í skólanum. Á viðtalsdögum er öllum óskilamunum sem þá eru í húsi komið fyrir á gangi á 1. hæð til þess að foreldrar/nemendur geti kannað hvort þeir kannist við sínar eigur meðal óskilamunanna. 

Ekkert eiginlegt bókasafn er í skólanum. Við nýtum óspart Borgarbókasafn Reykjavíkur í Tryggvagötu og höfum notið frábærrar þjónustu starfsmanna þar um árabil. Allir nemendur fara vikulega eða oftar í bókasafnið.

Nemendur sækja íþróttakennslu í íþróttasal Kvennaskólans í Miðbæjarskólahúsinu og sund í Sundhöll Reykjavíkur. 

Í Aðalnámskrá grunnskóla (2011 og 2013) segir, að í samræmi við reglugerð um hollustuhætti á sund- og baðstöðum skuli skipulag sundkennslunnar miðast við að 15 nemendur séu að jafnaði í hverjum sundtíma. Til að tryggja öryggi nemenda í kennslustundum og tryggja að markmiðum kennslunnar verði náð skulu nemendur ekki vera fleiri en 15 þegar þeir eru 10 ára og yngri eða ósyndir.  Í skipulagi sundkennslu þarf einnig að taka tillit til þeirrar aðstöðu sem er fyrir hendi, s.s. stærðar laugar og búningsaðstöðu.

Ef nemendur eru fleiri en 15 í sundtíma þá gerir mennta- og menningarmálaráðuneytið þá kröfu að kennari hafi með sér aðstoðarmann í sundtímanum. Viðkomandi aðstoðarmaður verður að hafa tekið hæfnipróf sundstaða eins og reglugerð nr. 814/2010 gerir kröfur um.

Í reglugerðinni er jafnframt fjallað um öryggi í skólasundi. Samkvæmt reglugerðinni skal íþróttakennari í samvinnu við starfsmenn sundstaða fara árlega, eða við upphaf hvers sundnámskeiðs, yfir helstu reglur sem gilda á sundstöðum og yfirfara vinnutilhögun í tengslum við sundkennslu þannig að fyllsta öryggis nemenda sé gætt. Íþróttakennari skal einnig gera nemendum grein fyrir þeim hættum sem geta fylgt sundiðkun.

Í breytingu á reglugerð nr. 814/2010 sem gerð var á árinu 2012,  nr. 773/2012 kemur m.a. fram: „Þar sem hópar barna undir 10 ára aldri eru saman komnir skulu ekki fleiri en 15 börn vera í umsjá hvers kennara eða ábyrgðarmanns hóps sem, ásamt laugarverði, er ábyrgur fyrir hópnum. Miða skal við að þeir sem starfa með eða hafa umsjón með börnum og ungmennum í æskulýðsstarfi séu lögráða og hafi þjálfun, menntun, þekkingu eða reynslu til starfsins, sbr. 1. mgr. 10. gr. æskulýðslaga nr. 70/2007. Til að auðvelda kennara eða ábyrgðarmanni hópa að fylgjast með hverju barni skulu hópar barna sérstaklega auðkenndir með áberandi lit á sundhettum, armböndum, vestum eða á annan sambærilegan hátt. Fyllsta öryggis skal gætt þegar komið er með hóp af börnum og unglingum í sund. Kennarar og ábyrgðarmenn hópa skulu kynna sér reglur sund- og baðstaða og aðstoða starfsfólk sund- og baðstaða við gæslu.

Sundkennarar, sundþjálfarar og leiðbeinendur skulu ávallt gæta þess í samvinnu við starfsfólk sund- og baðstaða að nemendur fari ekki að laug á undan þeim. Sundkennarar, sundþjálfarar og leiðbeinendur skulu aldrei víkja frá laug fyrr en allir nemendur/iðkendur yngri en 15 ára eru farnir inn í búnings- eða baðklefa. Þau varúðaratriði sem hvíla á laugarverði hvíla einnig á kennara, þjálfara og leiðbeinanda varðandi nemendur og iðkendur.“

Skv. aðalnámskrá grunnskóla frá 2013 í skólaíþróttum (bls. 181-193) er í skólasundi miðað við að nemendur fái a.m.k. 40 mínútur á stundaskrá skóla í hverri viku skólaársins. Þar sem slíku skipulagi verður ekki við komið skal kenna skólasund á árlegum námskeiðum. Á slíkum námskeiðum skal hver nemandi fá að lágmarki 800 mínútur í kennslu. Sá tími, sem eftir stendur, skal nýta til skólaíþrótta (miðað er við 40 mín. kennslustundir).

Skv. viðmiðunarstundaskrá aðalnámskrár grunnskóla, er gert ráð fyrir að heildartími skólaíþrótta í 1.- 4. bekk sé 480 mínútur í viku hverri, 5.-7. bekk sé 360 mínútur og 8.-10. bekk 360 mínútur (að meðaltali 120 mínútur í hverri viku skólaársins frá 1. – 10. bekkjar).

Ráðuneytið væntir þess að allir skólastjórnendur og þeir kennarar sem annast sundkennslu, kynni sér vel ákvæði í lögum, reglugerðum og aðalnámskrá um skólaíþróttir, sjái til þess að nemendur fái lögbundna kennslu og að fyllsta öryggis sé gætt.

Nemendur hafa því miður ekki skápa í skólanum. Við búum við þröngan húsakost og sjáum ekki fyrir okkur að hægt sé að koma slíkum skápum fyrir með góðu móti.  Til þess að tryggja að eigum nemenda sé ekki stolið er húsinu er lokað kl. 8.30 og eftir það þarf að hringja á dyrabjöllu til þess að komast inn í skólahúsið. Hver nemandi hefur þó sitt hólf í bekkjarstofu þar sem hann getur geymt persónuleg námsgögn.