Foreldrar

Bekkjarfulltrúar og foreldraráð Tjarnarskóla veturinn 2024 – 2025 

Þórunn Benný Finnbogadóttir

Eygló Ósk Arnfreysdóttir

Svava Halldórsdóttir

Ólöf Helga Jakobsdóttir

Magnús Sævar Magnússon

Bergljót Arnalds

Anna Sif Jónsdóttir

Þar sem nemendur í skólanum eru einungis á milli 50 og 60 eru bekkjarfulltrúar jafnframt fulltrúar í foreldraráði.

Stefna skólans í foreldrasamstarfi

Foreldrasamstarf er afar mikilvægur þáttur í skólastarfinu. Í Tjarnarskóla segjum við gjarnan að foreldrahópurinn sé eins og ,,Tólfan“ með íslensku landsliðunum. Foreldrar eru hvetjandi og leggja ómælt lið með margvíslegum hætti.  Það er eftirsóknarvert að fá foreldra á sem fjölbreyttastan hátt inn í skólastarfið. Góð kynni, samhugur og samvera með nemendum og starfsfólki skilar sér í hærra ánægjustigi, meiri öryggistilfinningu og betri samskiptum. 

Á hverju hausti eru haldnir haustfundir með foreldrum. Á þeim fundum tilnefna foreldrar tvo fulltrúa úr hverjum bekk (samtals 6 fulltrúa) í stjórn foreldrafélags. Þar sem skólinn er fámennur eru sömu fulltrúar í bekkjarráði og í stjórn foreldrafélagsins. Skólastjóri kallar síðan hópinn saman og hópurinn kemur sér saman um verkefni vetrarins.

Verkefnaskrá – viðburðir

Á fyrstu áratugum Tjarnarskóla var aðkoma foreldrafélagsins sem slíks tiltölulega afmörkuð. Á síðari árum hefur þátttaka foreldra aukist til muna. Í því felst að á hverju hausti er kosið í foreldraráð. Skólastjóri kallar fulltrúa ráðsins saman og fulltrúar skipta með sér verkum og fundar um verkefni vetrarins. Sú hefð hefur skapast að foreldraráðið skipuleggur mjög veglegan viðburð síðasta fimmtudag í nóvember ár hvert. Þá koma foreldrar, nemendur og jafnvel fleiri fjölskyldumeðlimir saman í skólanum ásamt kennurum skólans og eiga saman ljúfa stund. Þá eru jólaföndurverkefni á dagskrá, jafnvel tónlistarflutningur. Þá nýta 10. bekkingar gjarnan tækifærið og bjóða upp á veitingar á vægu verði en afrakstur rennur í ferðasjóð nemenda.

Foreldrafélagið hefur komið með ýmsar góðar ábendingar í skólastarfið. Foreldrar hafa gjarnan komið sem gestafyrirlesarar og segja frá starfsvettvangi sínum eða áhugamálum. Foreldrar hafa komið með góðar ábendingar/tillögur í þá veru að krydda skólastarfið. Nemendur hafa einnig leitað til foreldra fyrir árshátíð skólans. Þá er óskað eftir liðsinni við að finna gjafir og viðurkenningar til þess að afhenda við þetta hátíðlega tækifæri. Foreldrar hafa lagt gott lið í þessum efnum.

Mikil þátttökuaukning foreldra síðast liðin ár 

Aðkoma foreldra að skólastarfinu hefur eflst undanfarin ár. Öflugir foreldrar hafa verið í foreldraráðinu og staðið fyrir nýjungum og verið virkir þátttakendur í talsvert meira mæli. Við erum afar sátt við hversu hátt hlutfall foreldra mætir á viðburði þar sem þátttöku þeirra er óskað. Hér má nefna fundi, opna fundi skólaráðsins, fyrirlestra og  undirbúning fyrir ,,ungbarnadaga“ í 10. bekk og vorgrill í Mæðragarðinum. Foreldrar hafa einnig staðið fyrir viðburðum eins og keiluferðum, pantað vöffluvagninn og ísbílinn, haft spilakvöld, farið í Minigarðinn og fleira í þeim dúr. 

Þátttaka í mótun skólastarfsins og aðkoma foreldra að fleiri þáttum í skólastarfinu

Hér má nefna þátttöku í ,,opnum fundum“ sem skólaráðið hefur staðið fyrir á hverju ári undanfarin ár. Öflug hugmyndavinna hefur verið unnin og ýmsu góðu komið til leiðar í kjölfarið. Einnig má nefna að foreldrar hafa lagt lið við að koma nemendum í heimsóknir á vinnustaði og verið virkir við að koma með hugmyndir í skólaráðinu.  

Undirbúningur og fjáröflun fyrir útskriftarferð og útskriftarhátíð 10. bekkinga.

Hér hafa foreldrar komið sterkir inn og lagt lið í samvinnuverkefni nemenda, foreldra og starfsmanna.