Tjarnarskóli - lítill skóli með stórt hjarta

Fréttir


  • Tjarnó tók þátt í Stíl 2. febrúar

    Þær Móeiður, Arna, Sara, Freyja Rún og Júlía G. hafa undirbúið sig fyrir keppni í Stíl, hönnunarkeppni grunnskólanna síðan í haust. Keppnin fór fram í íþróttahúsinu, Digranesi. Það liggur mikil vinna í að hanna kjól, skó, fylgihluti, förðun og hárgreiðslu auk þess sem þær þurfa að skila inn möppu með lýsingu á viðfangsefninu. Við erum stolt af þessum flottu stelpum sem lögðu sig fram í hönnun og undirbúningi. Birna kennari á líka hrós skilið fyrir að hvetja, styðja og vera með þeim í ferlinu. 

  • Skautasvellið pússað 31. janúar

    Það er frábært að nýta svellið á Tjörninni í frostinu. Nemendur í íþróttum gerðu það og komu með rjóðar kinnar í hús.

  • Fótbolti á Tjörninni 30. janúar

    Það er gaman að breyta til og sparka fótbolta á ísnum á Tjörninni þegar það býðst. 

  • Smíðakrakkar fá hrós

    Valdór smíðakennari er ánægður með hópinn og sendi nokkrar skemmtilegar myndir. 

  • Glæsileg rannsóknarverkefni á sýningu 29. janúar

    Árleg rannsóknarverkefni eru meðal þeirra mörgu verkefna sem við erum svo stolt af. Nemendur velja sér viðfangsefni og útfæra eftir eigin höfði. Útkoman er alltaf ákaflega fjölbreytt og sem er gaman að skoða. Foreldrar mættu á sýninguna og hrósuðu nemendum fyrir flott verkefni. Við veitum alltaf viðurkenningar þeim nemendum sem fá A og að þessu sinni voru það þau Ívar í 8. bekk, Agnes, Hera, Rakel og Wiktoría í 9. bekk og þær Mist, Guðrún Ýr  Júlía G og Eva María í 10. bekk sem fengu viðurkenningarskjal og hádegishressingu í verðlaun. Til hamingju verðlaunahafar og allir hinir!  Glæsileg verkefni!

  • Söngkeppni grunnskólanna - undankeppni - Rakel vann!

    Þær Rakel, Hera og Guðrún, allar í 9. bekk, kepptu fyrir hönd Tjarnarskóla í undankeppni söngkeppni grunnskólanna. Keppnin var haldin í Hagaskóla. Við erum mjög stot af þessum frábæru stelpum sem stóðu sig svo vel og vorum alveg í skýjunum yfir að Rakel fór með sigur af hólmi og kemur til með að keppa í útslitakeppninni. Áfram, Rakel! Áfram Tjarnó!

  • Óttar Sveinnson ,,útkall" góður gestur 22. jan.

    Óttar Sveinsson, rithöfundur, sem nefnir sig gjarnan ,,útkallinn" kom í heimsókn til 10. bekkinga. Hann sagði nemendum frá bókunum sínum og sýndi þeim einnig myndir og myndband sem tengdust bókinni ,,Árás á Goðafoss" sem var skotinn niður í seinni heimsstyrjöldinni. Óttar sagði m.a. frá því þegar skipsverji á Goðafossi, sem komst af, hitti þýskan bátsverja á kafbátnum sem skaut Goðafoss í kaf. Þeir hittust á bókamessu í Frankfurt. Sá fundur var tilfinningaþrunginn og áhrifamikill. Bestu þakkir, Óttar, fyrir heimsóknina.

  • Ungbarnadagar hjá 10. bekk í janúar

    Á hverju ári taka 10. bekkingarnir okkar þátt í svo nefndum ungbarnadögum í skólanum. Þeir frá fræðslu um ábyrgð, virðingu, jafnrétti og ýmislegt fleira sem tengist uppvaxtarárunum og þeim veruleika sem foreldrahlutverkið felur í sér en Ólafur Grétar Gunnarsson var með fræðslu, bæði fyrir nemendur og foreldra í tengslum við þetta verkefni. Nemendur eru með sýndarbarn í rúmlega tvo sólarhringa og sinna því eins vel og þeir geta. Það var falleg og ljúf stemning í húsinu þessa daga og þreyttir ,,foreldrar" sem skiluðu barninu að loknu námskeiðinu. Nemendur stóðu sig frábærlega vel!

  • Leirlistarkrakkar á 2. önn

    Nemendur í leirlist vinna ótrúlega fallega hluti. Kristín Ísleifsdóttir, kennari sendi okkur mynd. 

  • Níundi bekkur heimsótti Sorpu 14. janúar

    Níundi bekkur heimsótti Sorpu í dag. Fengum frábæra og þarfa fræðslu um flokkun og sorp almennt. Áttundi og tíundi bekkur fara næsta mánudag. Vonandi skilar fræðslan sér einnig heim og að við verðum öll enn betri flokkarar og meðvitaðri neytendur. Heimsóknin er liður í átaki sem við erum í, nú í janúar, til að verða umhverfisvænni og betri neytendur.

  • Kósý föstudagur 4. janúar

    Gleðilegt nýtt ár! Bestu þakkir fyrir árið sem var að líða með kærum þökkum fyrir frábært samstarf!!!

    Byrjuðum árið með kósýlestri jólabókanna. Mjög notaleg stemning framan af morgni. Myndir tala sínu máli.  

  • Smíðakrakkar í góðum gír 13. des.

    Flottur hópur í smíði smiley

  • Jólaganga í íþróttatímanum 10. des

    Jóla-jóla-jóla.... ganga! 

  • Jólalegur föstudagur, skautar, jólamynd, jólapeysur...... 7. des.

    Það er nauðsynlegt að gera sér dagamun. Þess vegna ákváðum við hafa kakó, piparkökur, jólapeysur, skautaferð á Ingólfstorg og almennt jólalegan föstudag!!!

  • Níndubekkingar fóru á Listasafn Íslands 5. des.

    Níundubekkingar fóru á Listasafnið á sýninguna Lífsblómið, fullveldi Íslands í 100 ár. Mjög áhugaverð sýning. 

  • Íþróttir í snjónum 5. des.

    Það er hressandi að hafa íþróttatíma utan dyra. Hafa með sér húllahring eða eitthvað annað. Það er nefnilega það!

  • Aðventustund foreldrafélagsins 28. nóv.

    Kæra foreldraráð Tjarnarskóla! Bestu þakkir fyrir FRÁBÆRA samverustund í gær!!!!! Þetta tókst alveg meiri háttar vel, Flott verkefni, góð stemning og allt svo ljúft og fallegt! Við erum afar þakklát fyrir ykkar góða framlag og hvernig til tókst. Húrra fyrir ykkur! Líka fyrir ykkur, tíundu bekkingar og foreldrar! Hlaðborðið var glæsilegt og veitingarnar ljúffengar. Allir tóku þátt!!!!!! Myndirnar tala einnig sínu máli, enn og aftur takk fyrir ykkur!

  • 1.Des 1970
    Tíundubekkingar í heimsókn á RUV 23. nóv.

    10. bekkur fór í heimsókn á RÚV. Við fengum kynningu á UngRÚV og kíktum í stúdíó, búningageymslu og safnið þeirra svo eitthvað sé nefnt. Hluti af hópnum er á ,,storyinu” á Instagram hjá UngRÚV í dag. Þetta var mjög skemmtileg heimsókn.

  • Fræðsla Magnúsar Stef og Davíðs fyrir nemendur og foreldra 22. nóv.

    Það er brýnt fyrir alla að huga að forvörnum og fræðast um áhrif skaðlegra efna fyrir líkama og sál. Þeir Magnús og Davíð mættu í morgunsárið og fræddu nemendur en síðdegis var sambærileg fræðsla fyrir foreldra og starfsmenn undir yfirskriftinni: Að vera sjáandi. Það var einstaklega góð mæting foreldra. Flott hjá þeim!!! Vonandi hafa skapast góðar umræður um viðfangsefnið til þess að forðast að bjóða hættunni heim.

  • Guðrún Ýr Guðmundsdóttir fékk íslenskuverðlaun Skóla- og frístundasviðs

    Það var hátíðleg stund í Hörpu á degi íslenskrar tungu, þegar Guðrún Ýr í 10. bekk tók við íslenskuviðurkenningu Reykjavíkurborgar. Hún var í glæstum hópi nemenda sem voru tilnefndir af kennurum í sínum skólum. Vigdís Finnbogadóttir, fyrrverandi forseti Íslands, og Marta Guðjónsdóttir, borgarfulltrúi, afhentu viðurkenningarnar sem voru verðlaunaskjal og bók með ljóðum Jónasar Hallgrímssonar. Við erum stolt af Guðrúnu og samgleðjumst henni og fjölskyldu hennar. Innilega til hamingju, Guðrún Ýr.


Efst á síðu