Tjarnarskóli - lítill skóli með stórt hjarta

Fréttir


  • Heimsókn í Sjóminjasafnið og varðskipið Þór

    Mánudaginn 10. mars fóru nemendur í Kvos og Læk í heimsókn í Sjóminjasafnið og fengu einnig að skoða varðskipið Þór. Sumir prófuðu að setjast í skipherrastólinn í brúnni. Það bar margt fyrir augu og nemendur voru áhugasamir að skoða safnið. Það má sjá fleiri myndir á myndasíðunni.

  • 1.Mar 1970
    Áhugaverð framhaldsskólakynning í Kórnum

    Nemendum í 10. bekk gafst mjög gott tækifæri til að kynnast fjölbreytni framhaldsskólanna 26. febrúar síðast liðinn. Sýningin var í Kórnum í Kópavogi. Vel var staðið að sýningunni og allri skipulagningu, nemendur sóttir í skólann og þeim skilað aftur. Ásdís, fyrrverandi Tjarnskælingur bauð Kristínu Diljá upp á hárgreiðslu en Ásdís er nemi í þeirri iðn.

  • Tíundubekkingar í keilu

    Nemendur í 10.bekk brugðu sér í keilu á dögunum. Um var að ræða síðbúin vikuverðlaun fyrir þátttöku í Raunveruleiknum, en þessir sömu nemendur sigruðu í þeirri keppni í nóvember og fengu afar vegleg verðlaun. Forráðamönnum Raunveruleiksins eru færðar þakkir fyrir þetta ágæta keilutækifæri. Það eru fleiri keilumyndir á myndasíðu.

  • ,,Opið hús" í febrúar

    Í lok febrúar skipulagði nemendaráðið Opið hús. Snyrtifræðingurinn Guðrún Halla kom í heimsókn og fræddi krakkana um húðsnyrtingu. Sumir duttu í lukkupottinn og unnu sér inn snyrtivöruglaðning. Stelpunum fannst mjög gaman að kynnast því hverning hægt er að skeyta neglurnar eins og sjá má á myndunum. Svo var spilað og kíkt á myndband.  Það eru fleiri myndir á myndasíðunni.

  • Unglingurinn í Gaflaraleikhúsinu

    Það var mikið hlegið á leikritinu Unglingurinn í Gaflaraleikhúsinu fyrir skemmstu.. Þeir Arnór Björnsson og Óli Gunnar Gunnarsson fóru á kostum. Leikritið dregur upp bráðskemmtilega mynd af lífi unglinga og hefur ýmsar tilvísanir, bæði kátbroslegar en einnig með alvarlegum undirtón. Þær Anna Dögg og Sara voru dregnar upp á svið og látnar taka þátt í einu atriðinu. Þær stóðu sig mjög vel við mikla kátínu skólafélaganna. Fín skemmtun sem foreldrafélag Tjarnarskóla stóð fyrir!

  • Myndmennt í þrívídd

    Nemendur í Kvos voru í skemmtilegum myndmenntatímum í dag. Efnið sem unnið var með var trépinnar og rófuteningar. Útkoman var stórskemmtileg. Það má sjá fleiri myndir á myndasíðunni.

  • Valið á föstudögum, góð tilbreyting

    Á föstudögum lýkur skólastarfinu með valtímum. Á 2. önninni völdu nemendur jóga, kvikmyndir, sauma, prjón og hekl, leikjagerð (role play) og tálgun. Á 3. og síðustu önninni, sem hefst í næstu viku verður fleira á boðstólum, nemendur velja þá að nýju. Á myndasíðunni má sjá fleiri myndir úr þessum tímum.

  • Tíundubekkingar æfðu foreldrahlutverkið

    Nemendur í 10. bekk tóku þátt í mjög krefjandi verkefni í síðustu viku. Þeir voru með sýndarbarn frá miðvikudegi til föstudags og sinntu barninu allan sólarhringinn. Það var ný lífsreynsla að þurfa í tíma og ótíma að gefa pela, skipta á bleyju, hugga og rugga samhliða því að vera í skólanum, tónlistarnámi og íþróttaiðkun.  Allir stóðu sig með mikilli prýði. Á föstudeginum var þreytan þó farin að segja til sín. Þetta verkefni er unnið í samvinnu við Ólaf Grétar Gunnarsson. Nemendur fá viðurkenningarskjal fyrir þátttöku í þessu námskeiði og auðvitað mikilvæga reynslu í farteskið.

  • Krakkarnir í Kvos fóru í Listasafn Reykjavíkur

    Nemendur í Kvos fóru með Veru, myndmenntakennara, á sýningu í Listasafni Reykjavíkur. Þar stendur yfir sýning á verki Katrínar Sigurðardóttur, Undirstöðu, sem var framlag Íslendinga til Feneyjartvíæringsins 2013. Skemmtilegt tækifæri!

  • Kynningarfundur fyrir foreldra 10. bekkinga

    Haldinn var kynningarfundur fyrir foreldra 10. bekkinga áður en verkefni ,,Hugsað um barn" fór af stað í skólanum. Ólafur Grétar Gunnarsson, kom og sagði foreldrum frá verkefninu. Þetta er í 5. skipti sem nemendur í Tjarnarskóla taka þátt í þessu verkefni. Tilgangurinn er að kynnast því hvaða ábyrgð og álag fylgir því að eignast barn og annast það. Ólafur lagði mikla áherslu á umönnunarþáttinn og þá staðreynd að á Íslandi er hlutfall unglinga, sem eignist börn áður en þeir eru í raun tilbúnir að takast á við það verkefni að verða foreldrar, með því hæsta sem gerist meðal þeirra þjóða sem við miðum okkur gjarnan við. 

  • Rannsóknarverkefni í vinnslu

    Nemendur eru allir að vinna við rannsóknarverkefni sem á að skila í mars. Einn liðurinn er að gera veggspjald til þess að kynna verkefnið. Veggspjöldin hanga nú frammi á gangi. Það verður spennandi að fylgjast með framganginum og sjá hversu hugmyndaríkir nemendur eru. Verkefnum má skila sem myndbandi, listaverki, líkani, útvarpsþætti, glærusýningu, hönnunarverkefni, nýsköpunarverkefni og svo framvegis.

  • Nýrri heimasíðu fagnað

    Í tilefni af því að ný heimasíða hefur verið birt á netinu gerðum við okkur glaðan dag. Skúffukaka og ísköld mjólk runnu ljúflega niður í maga. Loksins gefst aftur tækifæri til að færa fréttir af skólastarfinu. 

  • Ný heimasíða í burðarliðnum

    Nýja heimasíðan okkar hefur verið í smíðum síðustu vikur til þess að leysa þá gömlu af. Flutningar taka sinn tíma þannig að nýja síðan verður áfram í mótun, eftir að hún kemst í gagnið. Það er tilefni til að fagna, loksins getum við sýnt myndir og sagt nýjustu fréttir úr skólastarfinu.  Húrra! 


Efst á síðu