Tjarnarskóli - lítill skóli með stórt hjarta

Fréttir


  • Frábær aðventustund að hætti foreldrafélagsins

    Það hefur skapast skemmtileg hefð í skólanum að hittast í byrjun aðventu og njóta samverunnar. Foreldrar, nemendur, systkini afar og ömmur lögðu leið sína í skólann og tóku þátt í notalegri samveru. Tíundu bekkingar settu upp glæsilegt kaffihús þar sem boðið var upp á kræsingar og heitt súkkulaði. Þessi stund var ótrúlega ljúf og skemmtileg. Bestu þakkir til stjórnar foreldrafélagsins sem undirbjó daginn afar vel. Tíundu bekkingarnir fá einnig mikið hrós fyrir flott kaffihús. Afraksturinn fer í ferðasjóð nemenda. Skoðið endilega skemmtilegar myndir á myndakrækjunni.

  • Ævar Þór kynnti bókina sína

    Ævar Þór mætti til okkar og kynnti nýju bókina sína fyrir skömmu. Hann er hugmyndaríkur sem löngum fyrr. Við þökkum honum kærlega fyrir skemmtilega heimsókn.

  • Myndmenntarnemendur fóru á listasafn

    Myndmenntakennararnir Guðrún Vera og Sigrún eru duglegar að fara með nemendur á listasöfn. Alltaf forvitnilegt að skoða, upplifa og njóta.Það gerðu myndmenntakrakkarnir.

  • Hákon Darri fékk íslenskuverðlaun unga fólksins í Hörpu

    Í dag, 16. nóvember er dagur íslenskrar tungu. Árlega tilnefna skólarnir í Reykjavíkurborg nemendur til þess að taka á móti íslenskuverðlaunum í bókmenntaborginni Reykjavík. Að þessu sinni var það Hákon Darri sem fékk verðlaunin. Þeim er ætlað að auka áhuga grunnskólanema á íslenskri tungu og hvetja þá til framfara í tjáningu og töluðu og rituðu máli.

  • Halloweenundirbúningur

    Halloweenball var haldið í kjölfar prófa 1. annar. Undirbúningshópurinn stóð sig afar vel og lagði mikið á sig til þess að kvöldið heppnaðist vel. Við birtum fljótlega myndir af ballinu en setjum myndir af undirbúningnum hér inn. Það má sjá fleiri myndir á myndakrækjunni.

  • 1.Nóv 1970
    Foreldrar skipulögðu spilakvöld í Læk

    Foreldrar stóðu fyrir skemmtilegu spilakvöldi í Læk á miðvikudaginn. Það var afar góð stemning og allir skemmtu sér vel. Það er fyrirhugað að hafa annað slíkt kvöld á nýju ári. Takk fyrir gott framtak!

  • Foreldraráðið fékk góðan fyrirlesara um hættur á netinu

    Við fengum góðan gest, hann Hermann Jónsson, til þess að fræða foreldra um hætturnar á netinu þann 22. október síðast liðinn. Það er afar mikilvægt fyrir nemendur, foreldra og kennara að fræðast um hvað á sér stað í netheimum. Mörgum var brugðið. Umræðan er mjög mikilvæg. Við þökkum Hermanni kærlega fyrir heimsóknina og fræðsluna.

  • Upplestur úr Rökkurhæðum

    Höfundar Rökkurhæða; þær Birgitta Elín Hassell og Marta Hlín Magnadóttir, komu til okkar og lásu upp úr nýjustu Rökkurhæðabókinni, Vökumanninum. Við þökkum þeim kærlega fyrir góða heimsókn. Þær gerðu enn betur og skildu eitt eintak eftir handa nemendum í skólanum. Bestu þakkir!

  • Skyndihjálparnámskeið

    Fyrir nokkru fengum við tvo læknanema, þá Gísla Þór Axelsson og Gústav Arnar Davíðsson í heimsókn. Þeir fræddu nemendur um skyndihjálp. Í lokin fengu allir að prófa hjartahnoð. Við þökkum þeim Gísla og Gústav kærlega fyrir komuna en það var Rauði krossinn sem stóð fyrir fræðslunni. Gott framtak!

  • 1.Nóv 1970
    Foreldramorgnar með umsjónarkennara

    Sú nýbreytni var tekin upp á þessu skólaári að umsjónarkennarar hafa skipulagt foreldraspjall á mánudagsmorgni (þegar nemendur eru í íþróttum). Þá hefur gefist tækifæri til að spjalla og skiptast á skoðunum og upplýsingum. Það hefur verið ánægja með þetta, bæði hjá foreldrum og umsjónarkennurum. Nú þegar hafa verið foreldramorgna í öllum bekkjum einu sinni.

  • Unnið með leir

    Myndlistarnemendur unnu skemmtilegt verkefni í leir. Hver og einn fékk leirkúlur sem tóku breytingum í nokkrum þrepum. Það eru fleiri myndir á myndakrækjunni.

  • Leiklistarhópurinn vann útiverkefni

    Leiklistarhópurinn, undir stjórn Öddu Rutar, hefur verið í ýmsum verkefnum. Eitt þeirra fór fram utan dyra fyrir nokkru.

  • Flottar myndir í myndlistinni

    Myndlistarnemendur hafa unnið mörg flott verkefni. Eitt verkefnið var að vinna með ljósið í myrkrinu. Hægt er að skoða fleiri myndir á myndakrækjunni.

  • Haustferð í Gróttu

    Dagana 11. og 12. september fóru nemendur og kennarar í haustferð út í Gróttu og dvöldu þar í sólarhring. Það er ævintýralegt að dvelja í Gróttu þar sem sjórinn umlykur ,,eyjuna" hluta dvalartímans. Hópurinn kom glaður til baka eftir frábæra ferð. Það var grillað, farið í leiki, haldin kvöldvaka, spilað spjallað og svipast um í þessari náttúruperlu. Nýir og eldri nemendur kynntust betur og skemmtu sér saman. Við birtum fleiri myndir fljótlega.

  • Kynningar á valgreinum

    Í byrjun skólastarfsins fengu nemendur kynningar á hluta þeirra valgreina sem þeim stóð til boða á 1. önninni. Um var að ræða kynningu á skák, Lego-forritun, leiklist, skólablaði og spilum. Þessar kynningar tókust ágætlega og í kjölfarið völdu nemendur sér það sem þeim leist best á. Við fengum m.a. þau Stefán frá Skákakademíunni og Ástbjörgu Rut Jónsdóttur, leikkonu í heimsókn í tengslum við þessar kynningar sem fóru fram í þremur lotum á jafn mörgum dögum.

  • Ágústmorgunn í Hljómskálagarðinum

    Fyrsta skóladaginn fóru nemendur og kennarar í Hljómskálagarðinn í veðurblíðunni. Nýir og eldri nemendur fóru í ýmsa leiki til þess að hrista saman hópinn.

  • Skólasetning, sú 30. í röðinni

    Tjarnarskóli var settur í 30. sinn föstudaginn 22. ágúst í Dómkirkjunni. Það var ánægjulegt að hitta nýja og eldri nemendur, foreldra, afa, ömmur, systkini og aðra góða gesti. Þeir Ari Bragi Kárason og Karl Olgeirsson djössuðu skemmtilega inn skólaárið þegar þeir léku fyrir okkur á trompet og flygilinn góða. Það var svo sannarlega ljúf stemning. Við hlökkum til skólaársins framundan sem er jafnframt afmælisár skólans. María Solveig Héðinsdóttir, annar stofnenda skólans sem lét af störfum fyrir allmörgum árum, færði okkur fallegan rósavönd, skreyttan medalíu sem á stendur: ,,Tjarnarskóli, litli skólinn með stóra hjartað, settur í 30. sinn.

  • Falleg skólaslit í Dómkirkjunni 6. júní

    Skólaslitin fóru fram i Dómkirkjunni þann 6. júní síðast liðinn. Fjögur tónlistaratriði voru á dagskrá: Karen Eik í 10. bekk lék á víólu við undirleik Söruh Buckley, Sjana 10. bekkingur og Alex bróðir hennar, sem er fyrrum Tjarnskælingur, fluttu lag eftir Alex og texta eftir Sjönu, Alex lék á gítar en Sjana söng. Samar og Pétur léku einleik á fiðlu. Þetta var fallegur tónlistarflutningur sem setti afar fallegan svip á athöfnina. Auk ræðu Margrétar skólastjóra flutti Guðbrandur Óli kveðjuorð fyrir hönd útskriftarnemenda, Sigríður Johnsen, amma Ísaks, útskriftarnemenda,  færði skólanum þakkir og flutti kveðjuorð til útskriftarnemenda. Elín, mamma Sjönu og Alexar þakkaði fallega fyrir árin sem unglingarnir hennar hafa verið í Tjarnarskóla. Síðan fór fram verðlaunaafhending og síðan útskrift 10. bekkinga.

    Skólaslit eru ávallt mjög ánægjulegur viðburður. Eftir skólaslitin héldu tíundu bekkingar og fjölskyldur þeirra út í skóla þar sem var skemmtileg kveðjustund. Þær Andrea, Karen Eik, Móeiður, Samar, Sjana og Sonja höfðu skreytt stofur og ganga, nemendur komu með góðgæti á hlaðborðið og Karen kennari hafði sett saman skemmtilega myndasýningu frá skólaárum nemenda.  Karen kennari fékk góðan grip; nýtt ræðupúlt, sem afi Helgu Rakelar og Vigdísar hafði smíðað. (Sjá fleiri myndir á myndasíðu)

    Þetta var sannkallaður gleðidagur.  Síðan héldu nemendur út í sumarið og lífið fyrir utan dyrnar.

  • Samar fékk nemendaverðlaun Skóla- og frístundasviðs

    Á hverju skólaári tilnefna grunnskólar einn nemanda úr sínum skóla til þess að taka við nemendaverðlaunum Skóla- og frístundasviðs Reykjavíkurborgar. Markmið verðlaunanna er að hvetja nemendur til að leggja sig enn betur fram við að skara fram úr í námi, í félagsstarfi eða skapandi starfi. Við tilnefndum Samar með þeim orðum: Samar er góð fyrirmynd í skólanum og er duglegur námsmaður. Hún sýnir virkan áhuga og hefur jákvæð áhrif á aðra. Hún er skapandi og leggur sig fram í að ná árangri í öllu því sem hún tekur sér fyrir hendur. Hún hefur sýnt styrk í hópvinnu, sýnt frumkvæði og forystuhæfileika.

    Allir nemendur sem fengu tilnefningu fengu viðurkenningarskjal og bókargjöf. Við óskum Samar og fjölskyldu hennar innilega til hamingju. Hún er vel að þessari viðurkenningu komin.

  • Grillað og snú-snúað

    Það er hefð fyrir því að grilla pylsur og vera saman utan dyra þegar nálgast skólalok. Við gæddum okkur á ,,þjóðarrétti" Íslendinga á mánudaginn. Nú fækkar skóladögunum og prófin tekin við.


Efst á síðu