Tjarnarskóli - lítill skóli með stórt hjarta

Fréttir


  • Legókrakkar á fullu fyrir keppni

    Laugardaginn 14. nóvember ætla krakkarnir í Legóhópnum að taka þátt í keppninni Lego League í Háskólabíói ásamt á annað hundrað nemendum víðs vegar að á landinu. Þau hafa æft vel síðustu þrjá daga og eru til í slaginn. Við óskum þeim góðs gengis, að sjálfsögðu. Áfram Tjanró!!!!

  • Kahootverkefni

    Síðast liðna þrjá daga unnu nemendur bráðskemmtilegt verkefni. Um var að ræða lestur á stuttum útgáfum af Rómeó og Júlíu, eftir Shakespeare og Innrásinni frá Mars, eftir Orson Wells. Eftir lestur unnu nemendur verkefni, horfðu síðan á kvikmyndir um sama efni og í lokin var hópvinna þar sem unnin var spurningakeppni með því að nota forritið Kahoot. Alls voru hóparnir sjö. Það skapaðist skemmtileg stemning og spenna og auðvitað vann besti hópurinn. Í honum voru: Fanney, Ívana og Gunnur. Flott hjá þeim!  Til hamingju!

  • Hópeflisfyrirlestur í 9. bekk

    Þeir Benedikt Jóhannsson, sálfræðingur og Evar Friðriksson, sálfræðinemi og leikmaður í meistarflokki Vals í handbolta, voru góðir gestir í 9. bekk fyrir stuttu. Þeir héldu frábæran fyrirlestur um gildi þess að sýna jákvæðni og efla liðsheild í hóp, hvort sem er í íþróttum, bekk eða vinahópi, svo tekin séu dæmi. Líflegar umræður sköpuðust í bekknum. Elvar lýsti eigin reynslu úr handboltanum um hversu áhrifaríkt það er að hvetja og hrósa í stað þess að rífa niður og gagnrýna. Það er einmitt eitt af lykilatriðum í samskiptum okkar á milli! Við þökkum þeim kærlega fyrir komuna og fræðsluna.

  • Halloween 2015

    Það var mikið stuð og hryllingur á Halloween 2015. Nemendur skemmtu sér hið besta í skuggalegu umhverfi og hinum ýmsu búningum. Skoðið fleiri myndir í myndasafninu.

  • Foreldrar komu nemendum skemmtilega á óvart

    Foreldrar komu nemendum skemmtilega á óvart á föstudaginn. Þeir mættu í morgunsárið, lögðu á borð, bjuggu til skyrhristing, komu með bakkelsi, ávexti og alls konar spil. Síðan var boðið upp á þetta prýðilega góðgæti. Það var virkilega notaleg stemning í skólanum áður en hefðbundin skólavinna tók við eftir 1. kennslustund. Húrra fyrir foreldrum og bestu þakkir!!!!!

  • Gist í Gróttu, frábær samvera

    Haustferðin okkar var að þessu sinni í Gróttu. Hópurinn naut þess svo sannarlega að vera saman, grilla, hafa kvöldvöku, fara í Role Play, spila og spjalla út í eitt. Veðrið var einstaklega gott eins og hópurinn í heild sinni. Skoðið endilega fleiri myndir á myndakrækjunni.  

  • Ævintýravika með 30 erlendum gestum

    Gestirnir okkar frá Spáni, Ítalíu, Grikklandi, Finnlandi og Slóveníu hafa gert vikuna tilbreytingaríka og skemmtilega. Sextán nemendur frá þessum fimm löndum hafa gist hjá Tjarnarskólakrökkum og fjórtán kennarar eru einnig með í för. Dagskráin hefur verið fjölbreytt; útivera í Gufunesbæ, kynning á miðborginni okkar, Gullni hringurinn, hvalaskoðun, Bláa lónið, Laugardalurinn, sund og Elliðaárdalurinn hafa verið meðal viðkomustaða í vikunni. Þessi gefandi samvera tengist Erasmusverkefni sem Tjarnskælingar taka þátt í og hafa fengið styrk til þess. Um er að ræða gagnkvæmar heimsóknir og samvinnu í gegnum netið. Það er ótrúlega skemmtilegt að taka þátt í verkefni eins og þessu og það verður spennandi að fá einnig að fara í heimsókn til einverra af þátttökulöndunum í vetur.

  • Fínn haustfundur með foreldrum

    Í vikunni héldum við árangursríkan haustfund með foreldrum. Foreldrar unnu m.a. í hópum við að skipuleggja vetrarstarfið. Margar skemmtilegar hugmyndir eru í farvatninu, s.s. keiluferð, auka-ferðalag, kynning á dúfnarækt, heimsóknir, kynningar, spilakvöld, pizzukvöld.... og fleira. Það er ómetanlegt að fá foreldrana í auknum mæli inn í skólastarfið. Hlökkum til vetrardagskrárinnar.

  • Skólasetning 2015

    Skólasetningin í Dómkirkjunni var ánægjuleg. Sessý Magnúsdóttir, fyrrverandi Tjarnskælingur kom og söng ótrúlega fallega fyrir okkur. Söng okkur inn í nýtt skólaár sem við hlökkum til að takast á við.  Alltaf gaman að hitta nýja nemendur og þá sem voru að koma aftur. Ætlum að hafa stuð og stemningu í vetur. Flottir krakkar í húsi.

  • Nýtt skólaár framundan

    Nú styttist í skólasetninguna sem verður 24. ágúst kl. 16.00 í Dómkirkjunni. Við hlökkum til endurfunda og að hitta nýja nemendur.

    Nýtt skólaár lofar góðu. Kennararnir eru í óða önn að skipuleggja starfið framundan. Það er einnig tilhlökkun að taka á móti hópi erlendra nemenda og kennara í september: Þeir koma frá Finnlandi, Ítalíu, Slóveníu, Grikklandi og Spáni. Það verður spennandi!

    Hlökkum til að hitta ykkur á skólasetningunni!

  • Ánægjuleg skólaslit, þau 30. í röðinni

    Skólaslitin voru einkar ánægjuleg stund fyrir okkur Tjarnskælinga. Einstaklega falleg ávörp yljuðu svo sannarlega. María Solveig, annar stofnandi Tjarnarskóla rifjaði upp skólaárin í Tjarnó, Guðrún, 10. bekkingur hélt ótrúlega fallega útskriftarræðu og pabbi hennar, hann Jón Þór, flutti kveðjuræðu fyrir hönd foreldra útskriftarnemenda. Þórdís, ein mamman í 10. bekk bættist einnig í hóp þeirra sem flutti ávarp og Þórir, umsjónarkennari 10. bekkjar kvaddi hópinn sinn á eftirminnilegan hátt........

  • Anna Dögg fékk viðurkenningu Skóla- og frístundasviðs

    Við vorum afar stolt af Önnu Dögg, nemanda í 9. bekk, sem fékk viðurkenningu frá Skóla- og frístundasviði Reykjavíkur á þriðjudaginn. Athöfnin var í Hlíðaskóla að þessu sinni og var mjög ánægjuleg. Kennarar skólans sendu inn eftirfarandi umsögn um Önnu Dögg : 

    Anna Dögg er öflugur og heilsteyptur einstaklingur. Hún er glaðlynd og félagslynd og hrífur aðra nemendur skólans með sér. Hún hefur lagt félagslífi skólans gott lið og verið tilbúin að leggja  á sig fyrir aðra á því sviði. Hún er góð fyrirmynd. 

    Til hamingju, Anna Dögg!

  • Blóm, gjafir og árnaðaróskir í stórum stíl - bestu þakkir!

    Tjarnarskóla bárust margar gjafir, blóm og árnaðaróskir í afmælisveislunni. Margir lögðu okkur lið við að flytja allt saman yfir í skóla að afmæli loknu og það var afar blómlegt um að litast á kennarastofunni daginn eftir. 

  • Tjarnarskóli 30 ára. HÚRRA!

    Fimmtudaginn 21. maí héldum við upp á 30 ára starfsafmæli Tjarnarskóla í Iðnó. Það var ótrúlega gaman að sjá fyrrverandi og núverandi nemendur, starfsmenn og foreldra. Hátt á annað hundrað gestir fögnuðu áfanganum með okkur. Þær Ivana og Stella, núverandi nemendur í skólanum léku á píanó, Margrét skólastjóri flutti ávarp og sýndi stutt myndband um tilurð og fyrstu skrefin við stofnun skólans. Sindri Sindrason, dagskrárgerðarmaður rifjaði upp Tjarnarskólaárin á afar hlýlegan hátt, Sjana Rut, framhaldsskólanemandi og fyrrverandi Tjarnskælingur söng. Starfsmenn Tjarnarskóla færðu skólanum gjöf og þakkir og Salka Sól, fjöllistamaður söng og spilaði fyrir okkur. Eitt lagið sem hún flutti var lag sem hún samndi á meðan hún var í skólanum.  Mjög skemmtilegt! Það var ljúft að upplifa góða stemningu, taka við mörgum árnaðaróskum, blómum og gjöfum á afmælisdeginum. Við erum mjög þakklát fyrir þessa fallegu og góðu stund.Kærar þakkir þið öll sem tókuð þátt!!!! 

  • Samstarf við Skema um forritun

    Það hefur verið gaman að fylgjast með forritunarkrökkunum og Snædísi. Nemendum stóð til boða að taka þátt í forritunarnámskeiði í vali á 3. önn. Kennari frá Skema, hún Snædís, kom til okkar á mánudögum og vann með nemendum að ýmsu er lýtur að forritun. Á myndinni eru flestir í hópnum ásamt Snædísi.Við þökkum henni kærlega fyrir notalega samveru og góða fræðslu.

  • Styttist í afmæli Tjarnarskóla. Við hlökkum til!!!

    Nú styttist í að við höldum upp á 30 ára starfsafmæli Tjarnarskóla. Við ætlum að gera okkur glaðan dag í Iðnó við Tjörnina. Við fáum nemendur og góða gesti til þess að skapa fína stemningu og veitingar verða á boðstólum. Þau Salka Sól söng- og leikkona, Sindri Sindrason, sjónvarpsmaður og Sjana Rut, framhaldsskólanemi, verða góðir fulltrúar fyrrverandi nemenda við að koma okkur í afmælisgírinn. Stella María og Ivana, nemendur í Tjarnarskóla verða einnig með tónlistarflutning. Við vonum að fjölskyldur nemenda fjölmenni og að fyrrverandi nemendur og kennarar ásamt öðrum góðum gestum fagni ærlega með okkur.Fyrir gesti af yngri kynslóðinni verður boðið upp á andlitsmálningu. Við hlökkum til!!!

  • Frábær fyrirlestur Þórdísar um sexting

    Hún Þórdís Elva Þorvaldsdóttir kom til okkar í vikunni og fræddi nemendur um sexting. Hún kom fyrr í vetur með fyrirlestur fyrir foreldra og kennara og þá báðum við hana um að koma og spjalla við nemendur. Það sköpuðust líflegar umræður og það er öruggt að allir fóru upplýstari af þessum frábæra fyrirlestri sem er liður í að vekja alla til umhugsunar um myndbirtingar á netinu og dreifingu á myndefni. Kærar þakkir, Þórdís!

  • María, mamma Júlíönnu í 10. bekk, með fyrirlestur um Afríkuferð

    Það var afar ánægjulegt að fá Maríu, mömmu Júlíönnu í 10. bekk, í heimsókn í vikunni. Hún sýndi okkur myndir og sagði okkur frá heimsókn mæðgnanna til Afríku. Þær heimsóttu skóla sem er rekinn af ABC-hjálparstarfi, en Tjarnskælingar hafa lagt ABC-söfun lið undanfarin ár. Ferðin hefur greinilega verið mikið ævintýri og heillandi að sjá hvað þær upplifðu. Það er mjög gaman þegar foreldrar koma með innlegg eins og þetta í skólastarfið.

  • Opinn fundur skólaráðs 2015

    Í síðustu viku var ,,opinn fundur" skólaráðs Tjarnarskóla. Viðfangsefnið var:  Hvernig getum við aukið samkennd, vellíðan, vináttu og jákvæð samskipti? Einnig var rætt um með hvaða hætti foreldrar geti orðið virkari þátttakendur í skólasamfélagi Tjarnarskóla. Einnig var óskað eftir ábendingum um hvernig hægt er að gera gott skolastarf enn betra. Niðurstöður eru í vinnslu og verða settar inn í fundargerð skólaráðs fljótlega (verður hægt að nálgast á heimasíðu skólans).

  • Helga Júlía kom með Matthildi Júlíu

    Hún Helga Júlía kennari átti litla stúlku í febrúar og þær mæðgur komu í heimsókn til okkar fyrir stuttu. Þrjár stúlkur í 9. bekk tóku sig til og bökuðu köku handa þeim mæðgum og ritarinn, hún Sigrún Edda, prjónaði svo fallegan kjól handa þeirri stuttu. Það var mikil gleði að fá að hitta þær og knúsa litlu Matthildi Júlíu. Við óskum litlu fjölskyldunni alls hins besta.


Efst á síðu